O Proxecto Siefi
SIEFI: Sistema de Información Empresarial para o Fomento da Innovación
SIEFI (Sistema de Información Empresarial para o Fomento da Innovación) é un proxecto aprobado no marco de Interreg III A, orientado a desenvolver iniciativas que promovan o fomento da innovación no ámbito empresarial da eurorrexión Galicia – Norte de Portugal.
A Fundación para o Fomento da Calidade Industrial e Desenvolvemento Tecnolóxico de Galicia (Fundación Calidade), dependente da Consellería de Innovación e Industria da Xunta de Galicia, actúa como xefe de fila, contando coa colaboración de destacados socios da eurorrexión.
O proxecto pretende concienzar, difundir e orientar as empresas en accións que posibiliten a definición e implantación dunha cultura innovadora que sirva como eixo para definir novas liñas estratéxicas, para impulsar actuacións anticipativas fronte aos novos retos e para incrementar a produtividade a medio e longo prazo.
As súas actuacións contemplan accións orientadas a todos os sectores produtivos, e afondan especialmente nos sectores da automoción e da madeira.
Paralelamente busca contar cun completo mapa empresarial, con información integrada e consistente que ofreza resultados fiables.
O período de realización do proxecto comprende os anos 2006 e 2007.
Últimas accións
O día 29 de novembro de 2007 preséntanse os resultados do proxecto en Vigo, na sede da Confederación de Empresarios de Pontevedra, contando coa participación do director xeral de Investigación, Desenvolvemento e Innovación da Xunta de Galicia e de destacados representantes dos socios do proxecto.
Nestes días vense de poñer á disposición do público o sistema de información que permite consultar vía web os resultados das enquisas sobre o estado da innovación feitos na eurorrexión, e que pretende que unha organización empresarial poida contrastar a situación da innovación propia fronte á competencia.
Durante o mes de novembro de 2007 publícanse os informes realizados polos socios do proxecto sobre a situación da innovación en Galicia (Fundación para o Fomento da Calidade Industrial e Desenvolvemento Tecnolóxico de Galicia), no norte de Portugal (BIC Minho), xunto aos orientados especificamente ao estudo da innovación no sector da Automoción (Centro Tecnolóxico da Automoción de Galicia) e Madeira (Clúster da Madeira de Galicia).
Nas instalación do Centro para a Excelência e Inovação na Indústria do Automóvel, en Maia (Portugal), levouse a cabo en outubro de 2007 a última xuntanza de seguimento do proxecto SIEFI, nos que se acordaron as accións correspondentes aos derradeiros meses do proxecto.
A Fundación para o Fomento da Calidade Industrial e Desenvolvemento Tecnolóxico de Galicia, desenvolve un modelo de innovación co obxectivo de caracterizar, de maneira concreta, os elementos que interveñen na implantación da innovación nas empresas da eurorrexión.
